Бу дьыл олунньу 3 күнүгэр Дьокуускай куоракка Төрөөбүт тыл декадатын көрсө, “Айыы Кыһата” национальнай гимназиятыгар бэһис төгүлүн куораттааҕы Олоҥхо олимпиадата буолан ааста. Олимпиаданы биһиги, 2019 сылтан Дьокуускай куорат Үөрэҕин дьаһалтатын уонна куорат саха тылын учууталларын методическэй холбоһугун «Тыыннаах тыл» бырайыагын чэрчитинэн, резолюция ылынан, Айыы Кыһатыгар, Былатыан Ойуунускай аатынан «Олоҥхо түһүлгэтэ» диэн ааттаан, 5 кылаастан 10 кылааска диэри үөрэнэр куорат оҕолоругар анаан, сахалыы эйгэни тэрийэр сыаллаах ыыппыппыт. Оскуолаҕа сыл аайы оҕолор иккилии олоҥхону ааҕаллар, үөрэтэллэр. Оҕо олоҥхону аахтаҕына, кэрэтик саҥарарга, олоҥхо тылын өйдөөтөҕүнэ, мындырдаан толкуйдуурга, ис хоһоонун биллэҕинэ, сөптөөхтүк дьаһанан олорорго үөрэнэр, саха буолан килбэйэр диэн баҕа санаанан салайтаран олоҥхо олимпиадатын суолун тэлбиппит. Бастакы сирэй ыытыллыбыт олимпиадабытыгар барыта 90 оҕо кыттыбыта. Үлэбит салҕыы кэҥээн, 2020 сылтан олоҥхо декадатыгар анаан, сэтинньигэ Өрөспүүбүлүкэтээҕи кэтэхтэн олимпиаданы, С.Н.Донской-II аатынан Үөрэҕи сайыннарар, идэни үрдэтэр уонна Олоҥхо үнүстүтүүттэрин кытта тэрийэн сыл ахсын ыытабыт. Маны таһынан куораттааҕы олимпиада 2021, 2022 сыл кэтэхтэн ыытыллыбыта онно барыта 212, 218 оҕо кыттыбыта. СПЛ, ЯГНГ, Саха гимназия, «Айыы Кыһата», 7, 26, 33, 1, 2, 12, 21, 17, 9, 38, 31, 24, 29 нүөмэрдээх куорат, Хатас, Тулагы оскуолалара уонна Таатта улууһун лицейэ кыттыыны ылбыттара. 2023 сыл оскуолабытыгар сирэй ыытыллыбыт олимпиадаҕа барыта 112 оҕо кыттыбыт эбит буоллаҕына, быйыл 126 оҕо - СПЛ, ЯГНГ, Саха гимназия, «Айыы Кыһата», 17, 26, 33, 1, 12, 38, 31, 2 нүөмэрдээх куорат оскуолаларыттан кэлэн тургутууну аастылар. Онон сыл аайы Олоҥхо олимпиадатыгар кыттар оҕо ахсаана элбии турар. Быйыл олимпиадабыт сорудаҕа түөрт түһүмэхтээх ыытыллынна. Бастакы түһүмэххэ олоҥхо ис хоһоонугар, геройдарыгар сыһыаннаах ыйытыктарга хоруйдааһын, иккис түһүмэх олоҥхо олугун ситэрии, оҕо олоҥхо олугар көппүт тылы, тыл ситимин ситэрэн биэрэр. Олоҥхо тылдьыта диэн үһүс түһүмэххэ оҕолор күннээҕи олоххо киэҥник туттуллубат эбэтэр олох туттуллубат тыллар суолталарын быһаарарга холоноллор. Онтон төрдүс түһүмэххэ айар үлэ. Манна үөрэнээччилэр үс бэриллибит тиэмэттэн талан, үөрэппит олоҥхолоругар тирэнэн бэйэ суруйуутун оҥороллор. Олимпиада оҕо сахалыы ыраастык саҥарар дьоҕурун сайыннарарын таһынан, олоҥхону салҕыы ааҕарыгар, толору өйдүүрүгэр, чинчийэригэр олук уурар, саҥа эбии билиини арыйарыгар көҕүлүүр. Олоҥхо олимпиадатыгар көхтөөхтүк кыттыбыт бары үөрэнээччилэри уонна учууталлары эҕэрдэлиибит. Олоҥхону билэр, ааҕар, ырытар дьоҕургут салҕыы сайда турдун!
Липатова С.А., «Тыыннаах тыл» бырайыак
«Олонхо» түһүлгэтин салайааччыта.
03.02.2025
Оҕолор туоһу суруктара:
[
Скачать № 26 оскуола
Скачать №1 оскуола
Скачать № 2 оскуола
Скачать № 38 оскуола
Скачать ЯГНГ
Скачать Айыы Кыһата
Скачать Саха гимназия
Скачать СПЛ
Скачать №7 оскуола
Скачать №17 оскуола
Скачать № 12 оскуола
Скачать № 33 оскуола
Скачать № 31 оскуола
