“Ийэ тылбыт – барҕа баайбыт” педагогическай ааҕыыга барыта 38 Таатта улууһун уонна Дьокуускай куорат саха тылын учууталлара кытыннылар. Онтон «Саха тылын уонна литэрэтиирэтин бастыҥ учуутала» күрэскэ барыта 8 учуутал кыттыыны ылла: Жиркова С.В. Баайаҕа орто оскуолата, Егорова О.П. Хара-Алдан орто оскуолата, Павлова В.Д.Туора – Күөл орто оскуолата, Николаева Д.В. Уус-Таатта орто оскуолата, Хоютанова У.А. Чымынаайы орто оскуолата, Им.Г.Ф. 1№-дээх Ытык-Күөл орто оскуолата, Данилова Е.С. Тыараһа орто оскуолата, Каженкин Р.Н. Дьокуускай куорат «Айыы Кыһата». Учууталлар сарсыарда 10.00 чаастан аһаҕас уруоктарын уонна кылаас чаастарын ыыттылар. Күрэс экспертэрин Улуус Үөрэҕин методическай салаатын сэбиэдиссэйэ Луковцева Мира Николаевна иилээн-саҕалаан үлэлэттэ. Манна Таатта улууһун бастыҥ саха тылын учууталлара Кривошапкина Валентина Семеновна, былырыын Дьокуускай куоракка ыытыллыбыт Өрөспүүбүлүкэтээҕи 2024 сыл «Саха тылын уонна литэрэтиирэтин бастыҥ учуутала» күрэс лауреата Ефимова Варвара Константиновна уонна ИРОПК старшай преподавателэ, Липатова Светлана Афанасьевна экспиэрдээтилэр. Күрэс муҥутуур кыайыылааҕынан Им Галина Федоровна, иккис миэстэлээх лауреатынан Ульяна Афанасьевна Хоютанова уонна үһүс миэстэлээх лауреатынан Оксана Петровна Егорова буоллулар. Онон бу саас, Дьокуускайга ыытыллар Өрөспүүбүлүкэтээҕи күрэскэ Таатта улууһун аатын күрэх кыайыылааҕа Им Галина Федоровна көмүскүөҕэ.
Эбиэттэн киэһэ тэрээһин үөрүүллэх арыллыыта буолла. Бу тэрээһиҥҥэ Дьокуускай куорат уокуругун дьаһалтатын Үөрэххэ управлениетын салайааччыта Петрова Мария Петровна өйөбүлүнэн, куораттан уопсайа 26 учуутал буолан кыттыыны ыллылар. Делегацияны Дьокуускай куорат саха тылын учууталларын холбоһугун салайааччыта Заболоцкая Ульяна Васильевна, “Алгыстаах сахам тыла” саха тылын учууталларын ассоциациятын бэрэстээтэлэ Борисова Марианна Николаевна салайан илдьэ сырыттылар.
Э.К.Пекарскай аатынан Игидэй орто оскуолатын үлэһиттэрэ Миронов Андрей Александрович эдэр эрчимнээх салайааччылаах сахалыы сиэрин-туомун толорон, кэтэһиилээх ыалдьыттарын истиҥник үөрэн-көтөн көрүстүлэр, алгыстаах алаадьынан айах туттулар.
Саха литературата төрүттэммитэ 125 сылыгар аналлаах "Ийэ тылбыт-барҕа баайбыт" өрөспүүбүлүкэтээҕи педагогическай ааҕыы буолла. Учууталлар үлэлэрин баай уопуттарын сырдаттылар, үөрэх эйгэтигэр сонун көрүүлэрин сэһэргээтилэр. Учууталларбыт ситиһиилээхтик кыттан, 1,2,3 үрдэл хаһаайыннара буолан сүргэлэрэ көтөҕүлүннэ. Күрэс кэнниттэн учууталларга сэминээр ыытыллынна, онно Светлана Афанасьевна учууталларга уруок ирдэбилигэр дириҥ ис хоһоонноох сүбэлэрин биэрдэ.
Тэрээһини улуус уһуйааннарын үлэһиттэрин маастар кылаастара, норуот маастардарын, улуус оскуолаларын туруорбут улахан быыстапкалара, Улуу Кыайыы үбүлүөйдээх сылыгар анаммыт улуус бырайыага киэргэттэ. Учууталлар кырыымпаҕа да оонньоон, сиэл да хатан, оҕуруонан симэх да оҥорон көрөн, оҕолуу үөрдүлэр.
Үрдүк таһымнаахтык ыытыллыбыт тэрээһини Улуус Үөрэҕин методическай салаатын сэбиэдиссэйэ Луковцева Мира Николаевна иилээн-саҕалаан тэрийэн ыытта. Таатта улууһун саха тылын, литературатын учууталларын методоческай холбоһугун салайааччыта Им Галина Федоровна, бары да ытыктыыр сүгүрүйэр учууталбыт Кривошапкина Валентина Семеновна, Игидэй орто оскуолатын дириэктэрин солбуйааччыта Захарова Любовь Николаевна, саха тылын учуутала Ефимова Варвара Константиновна буолан, күүс-көмө буоллулар.
Тэрээһин бары салайааччыларыгар, ыалдьытымсах иллээх Игидэй нэһилиэк олохтоохторугар, кыттыыны ылбыт маастардарга, улуус учууталларыгар итии-истиҥ махталбытын тиэрдэбит. Сахабыт сарсыҥҥы саргытын салайсар кэнчээри ыччаппытын иитэргэ, чиҥ, дириҥ өйдөбүлү биэрэргэ – бары биир сомоҕо буолан, салгыы үлэлиэҕиҥ, киэҥ билиилээх ыччаты үрдүккэ көтүтүөҕүҥ, үтүөҕэ-сырдыкка сирдиэҕиҥ.
Липатова С.А.
Учууталлар туоһу суруктара:
СкачатьТаатталар
СкачатьКуораттар