Page 21 - ЛИТЕРАТУРА АА5ЫЫТА 4 КЫЛААС 1 ЧААhА

Эдэр булчут төтөлө суоҕа, субу кэлиэхтэрэ диэбиттии,
кытыыга тахсан кэтэһэн олорбута. Сотору-сотору киирэн
туһахтарын көрүтэлиирэ. Ол гынан баран кустар, кинини
билэн дуу эбэтэр аһыыр сирдэрэ уларыйан дуу, туһахха
чугаһаан биэрбэтэхтэрэ. Күн ортотугар диэри кыыс күүтэ
сатаан баран, салҕан, аччыктаан эмиэ тыатыгар тахсан
отонноон сиэбитэ. Бу сырыыга кини куула тыаҕа үүммүт
дьэдьэн угар түбэспитэ. Дьэдьэн барахсан ситэ буһа илик
отоҥҥо тэҥнээх буолуо дуо. Ньырбачаан тииһэ кыйан эрэ
тохтообута. Онтон туос иһитигэр үргээбитэ.

Отуутугар ыкса киэһэ эрэ эргиллэн киирбитэ. Киирээт,
чуо туһаҕар ааспыта. Бастакы туһаҕар биир кус иҥнэн ба-
ран быһа тардан барбыт, туһаҕын быһаҕаһа эрэ хаалбыт.
Иккис туһаҕа субуллан хаалбыт, бадаҕа, бэйэтэ сыыһа
иитэн, кус кэһэн барбыт. Үһүс туһаҕа букатын да суох.
Кыыс туһаҕын баайбыт хомуһун төрдө эрэ чоройон ту-
рара, ханнык эрэ бөдөҥ кус таппыт. Кыысчаан хомойон
ытаабатаҕа эрэ. Ньырбачаан, эмиэ баттаҕыттан сүүмэх
ылан, туһах хатар түбүгэр түспүтэ. Бу сырыыга туһаҕын
арыый суон гына хаппыта, тыаттан мас быһан туһаҕын
онно баайталаабыта. Ол курдук түөрт туһаҕы ииппитэ.

Сарсыарда күн кылбайа тахсыыта, Ньырбачаан сыы-
ры таҥнары күөлгэ сүүрэн тэлэмээттэнэн түспүтэ. Бөлкөй
хомус тумсугар ииппит туһаҕар туох да суоҕа. Туһаҕа бу-
катын да тыытыллыбакка төгүрүйэн турара. Иккис, үһүс
да туһаҕа кураанаҕа. Эмиэ мэлийэр киһи буоллаҕым дии
саныы-саныы, Ньырбачаан тиһэх туһаҕар барбыта. Икки
бөлкөй от икки ардынааҕы дьиэллэҥэскэ тиийэ илигиттэн
туох эрэ мөхсөр тыаһын истибитэ. Оо, үөрүү! Иҥнибит!
Ньырбачаан туох да бокуойа суох сүүрэн тиийэн, туһахха
иҥнэн мөхсө олорор сара көҕөҥҥө моонньугар түспүтэ.