Page 150 - Литература 6 кылаас 1 чааhа
P. 150
Ааҕыы, сэһэргэһии
МОИСЕЙ ДМИТРИЕВИЧ ЕФИМОВ
Саха норуодунай бэйиэтэ
(1927—2010)
Сахалыы…
Тоҕо мин саха буолан төрөөбүтүм буолуой?
Бу хоту дойдум кэрэтин билээри.
Толору дьолу манна саха эрэ булуо,
Кини эрэ өйдүө бу сир дьиктилэрин.
Манна туох барыта сахалыы саҥарар,
Сахалыы суугунуур баараҕай аар тайҕа.
Сахалыы чуопчаараллар талахха чыычаахтар,
Сахалыы намыыннык сандаарар саһарҕа.
Сахалыы, сахалыы… Барыта сахалыы…
Сахаҕа эрэ тааллар таабырын манна баар.
Тыал күөл урсунун көмүс ырбыылыы
Сахалыы салгынынан сайа охсор буолбаат.
Сахалыы ким билбэт сатаан өйдүө суоҕа
От-мас иччитэ туохтан үөрэрин.
Саха манна өрүүтүн өрө тута туруоҕа
Айыы киһитин айылгылаах үгэһин.
Сахалыы эрэ тылынан сатаан туойуллар
Олоҥхо мындыртан мындыр номоҕо.
Манна сахалыы саргыланан салаллар
Орто буор дойду уйгулаах олоҕо.
Сахалыы ураты дьиктини айаары,
Сахалыы талаанынан аар-саары байытаары,
Кэлэр кэнчээрибитин кэхтибэт кэскиллээри
Өбүгэлэрбит булбуттара бу Саха сирин —
Таҥара сахаларга анаабыт дойдутун,
Сир кэтит иэниттэн быһан биэрбит лоскуйун.
150
