Page 56 - Литература 7 кылаас 2 чааhа
P. 56
Анааннар көтөрдүүр сирдэрин
Аҕыйах тылынан мин кэпсиим.
Былатыан — убайым оҕонньор
Быйыл саас, ыам ыйын ортото,
Мууһунан, тэһитэ үктэтэн,
Буор ылар биэрэгин булуоҕа.
Муордьунап Ньукулай дойдута,
Бука дьэ, Хороҕо буолуоҕа, —
Хаамыылаах муҥутаан, күн аайы,
Хатастыыр суолунан тиэстиэҕэ.
Эр бэрдэ Эллэйбит, эрэбил,
Эһэлээх арыыга киирээри,
Эрилгэн сүүрүктүүн эрийсэн,
Эгдэйэ-эгдэйэ эрдиниэ.
Өлөксөй киэҥ Мүрү эбэтин
Киэркэйбит тумулун үрдүттэн,
Сүр үгүс мончуугу сүгүнэн,
Сүүрүүнэн сүргүллэн түһүөҕэ.
Көбдьүөрэр, омуннаах Чаҕылҕан
Хаҥалас Тааһыгар ыттыаҕа,
Көтөрө киирбэтэх түүнүгэр
Хайатын күлүгүн түүл гыныа...
Дьороху дыргыл-мүөт тыллааҕа
Доҥдоҥо сиригэр тахсыаҕа.
Чоххоохтон былдьырыыт өлөрөн
Тос-бааччы туттунан хаамыаҕа.
Байараап Өлөксөй хайаан да
Баҕарах күөлүгэр барыаҕа, —
Көлүөһэ сыарҕатын үрдүттэн
Күөрэтэн күппээллии ытыаҕа.
Тараҕай ыччата Кырысаан
Табаҕа таһынан сылдьыаҕа, —
Чаҥнардаах Лампатын уутугар
Чаастарын, күннэрин ыытыаҕа.
56
