Page 52 - Литература 7 кылаас 2 чааhа
P. 52
Тоҥхоҥнуу дойҕохтуур Лоокуут кыыл,
Дорообо, тоҕуста дорообо!
Туманнаах будулҕан тымныылаах
Якутскай куораттан турбутум, —
Сырыыттан, үлэттэн сылайан,
Сынньана Кавказтаан иһэбин.
Хотугу ыраах сир хонуутун
Хоһоонньут оҕото буолабын,
Колхозтаах олоҕум хотуутун
Хоһуйан, оһуордаан туойабын.
Улуукан Советскай Союһу
Устатын тухары мин сыыйдым, —
Эриэккэс дьол сырдык үөрүүтүн
Эппэйэр сүрэхпэр иҥэрдим.
Көмүстээх куорсуннаах аймаҕын,
Көрбөтөх ыраатан, аҕынным.
Чэ, кэпсээ, сэһэргээ, сиһилии
Ким ханна, ким хайдах сылдьарын.
Көрүнньүк үөмтэрэн, эрэйдээн,
Күүппэккэ, ыраахтан көтөөччү,
Көтөртөн күндүтүк көстөөччү
Күөх баттах көҕөнү көрүстүөҥ?
Буһуку, самыырдаах түүннэргэ
Бокуойа суох сапта турааччы —
Мончууктаах уулары булааччы
Моонньоҕон барахсан ханнаный?
Утуктаан иэдэйэр кэмнэргэ,
Моргуордаах моругун күүһүнэн
Уйгуурдан, уулары көтүтэр
Мороду доҕорбун билэҕиэн?
Кыракый уулардаах кытахха,
Кырыктыы-кырыктыы дьаарбайар
Кыччыгый, атах кус чыккымай
Кыһынын хайдахтык атаарда?
52
