Page 111 - ЛИТЕРАТУРА АА5ЫЫТА 4 КЫЛААС 1 ЧААhА

Хааннаныар диэри хаптаччы тэбистэ.
Хаһыы-ыһыы, сүүрүү-көтүү сүрдэннэ,
Мөккүөр бөҕө үксээтэ, үлүннэ...
«Мөккүөрэ суох хахханы талыаҕыҥ,
Хаххантан ордугу булуоххут суоҕа», — диэн,
Хаппыт тииттэн лэкэрэҥнии-лэкэрэҥнии,
Мэкчиргэ барахсан тыл эттэ.
«Мэйиилээх бэрдин, үлэһит үтүөтүн,
Тойон ыҥырыаны хандьыдаат туруорабыт,
Лоҥкунаан-лаҥкынаан үтүө киһи», — диэтэ
Бырдах барахсан, быыгынаан кэлэн.
Быыстала суох этиһэн бардылар,
Хандьыдааттарын сөбүлэспэккэ,
Хайдыһа-хайдыһа охсуһан бардылар.
Сотору соҕус соҕуруу диэкиттэн
Сурулас-курулас кынат тыаһаата.
Кырбый саҥата өрө кыбыгыраата,
Кыырт мохсоҕол саҥата хабдьыгыраата,
Хомпоруун саар хотой обургу
Хотоҕойо тыаһаата, тумса чучугураата,
Чачыгырыыр таас таҥалайа чаҥырҕаата,
Чаҥыргыы-чаҥыргыы сараадыйан кэллэ.
Мунньустубут көтөрүм этэ саласта,
Мунньахпыт айдаана адьас уурайда.
«Хара далаҕалар мунньахтыы олороллор...
Хааҥҥытын тохтохпут, уодьугаҥҥытын тартахпыт...
Хотойтон ордук хоруолу кими оҥордугут?
Хара ыттары үөрэтиэхпит», — дэстилэр,
Кырбый кыылларым кыбдьыгыраан түстүлэр,
Кынаттарын кыптыыйдаан элиэтээн бардылар,
Тырыта тыытаары тыҥырахтарын сарбаттылар...