Page 25 - Литература 7 кылаас 2 чааhа

Онно иэҕэйбит титиик кэтэҕэр
Кэҕэ кэлэн кэпсээннээн кэҕийэр,
Элиэ оҕонньор, тэлээрэн иһэн,
Кистии-кистии, киһини эргийэр.

Онно киһи атаҕын анныттан
Эриэн моҕотой эмискэ турар,
Кутуругун чөрөччү туттаахтаан,
Хаппыт тииккэ хачыгыраан тахсар.

Онно хомустаах күөл көхсүгэр
Аллара налыйбыт адаар сиэллээх
Атыыр сылгы биэлэрин күөйтэлээн,
Атын алааска аһата илдьэр.

Онно маҥан түөстээх хара ыппыт
Куобахтыы диэн куруҥҥа ыстанар.
Туоһу баайан, томторуктаан ыыппыт
Торбуйах түөкүн ийэтин эмэр.

Онно тааһынан баай Амма хотун
Күлэн чарылыыр күлүмнэс уутун
Көнө биэрэгин долгун отугар
Күөх хотуурдар күүгүнүү оонньууллар.

Онно тыаллар тыаны тыаһаталлар,
Мастары этиҥнэр дарбыйаллар.
Чаҕылҕаннар түүнү сырдаталлар,
Күн тахсыыта чыычаахтар ыллыыллар...

Онно ааспыт айдааннаах дьылларга
Баайдар кулуту таһыйаллара.
Бандьыыттар кыһылы кутаа уокка
Тыыннаахтыы ылан быраҕаллара.

Онно эн билигин көрүөҥ этэ —
Көҥүс буолбут хааннарын таммаҕын
Тордоммотох, аата суох бэчээтэ
Күөх кырыска харааран сытарын...

Онно унаар торҕо хочо сиргэ
Коммуна суолугар колхоз киирдэ,

25