Page 104 - Литература 6 кылаас 2 чааhа

Татыйык ыллыыра

Сүрэх быар манньыйыах,
Сүрдээхтик умайыах
Татыйык ыллыыра, тапталын туойара,
Тардара-кутара, сүрэҕин туотара...

Мин оҕом — Лаанык кыыс,
Туллук кыыс, туораах кыыс,
Мин чыычам,
Мин куукам,
Ылларан-таптатан, ымаҥныыр-далластыыр,
Ытыһа-тарбаҕа туллуктуу тарыптыыр...

Татыйык туойара,
Тапталын туотара,
Нуурайар чуумпу күөл дьиримнии истэрэ,
Нусхайар чугас тыа мичиҥнии күлэрэ...

Мин оҕом — Лаанык кыыс,
Саҥа кыыс, саргы кыыс,
Мык-мык мыскычык,
Чык-чык чыгычык,
Үҥкүүлээн-көтүөлээн битийэр-бэйбэҥниир,
Үөрээхтээн-көтөөхтөөн күлээхтиир-мичиҥниир...
Сүрэх-быар манньыйыах,
Сүрдээхтик умайыах
Татыйык ыллыыра, тапталын туойара,
Тардара-кутара, сүрэҕин туотара...

Мин оҕом — Лаанык кыыс,
Күндү кыыс, көмүс кыыс,
Туллукчаан,
Туораахчаан,
Куустахха, ыллахха, дьэ ордук ымастар
Кугасчаан төбөтүн абыраан сыллатар...

104