Page 138 - Литература 7 кылаас 2 чааhа
P. 138
Лоокуут
Иһит кырдьаҕаас,
Уонна сүбэлээ!
Эрэй суоҕар
Киһи тоҕо эрэйдэнэрий?
Ыарыы суоҕар
Киһи тоҕо ыалдьарый?
Арылык хараҕар абылатан.
Оҕоойук быһыытыгар оҕуурдатан,
Сүрэхпин сүүйтэрэн сүүдүйбүтүм,
Үҥэр таҥараҕа сүгүрүйбүтүм,
Хараҕым хатаммыта,
Сүрэҕим сөбүлээбитэ
Соҕотох биир эрэ баар…
Ол гынан баран,
Халыым кутар харчым суох,
Остуол туруорар арыгым суох.
Ол иһин,
Көхсүбэр санаа бөҕөнү көөнньөрөн,
Түөспэр баҕа бөҕөнү күлүүстээн сылдьабын.
Күһэҥэй
Итиччэ күүстээх тапталгар
Итиитик хардарар дуо, ол кыыһыҥ?
Лоокуут
Билэҕин дуо, кырдьаҕаас,
Мин кыайан биллэрэ иликпин.
Биир тылы саатар этэргэ
Мин күүһүм тиийбэт.
Эмискэччи кинини көрсөн
Итинник таптаабытым буоллар,
Иҥнибэккэ-туттубакка
Этиэм этэ барытын.
Оттон биһиги
Убай-балыс курдук
Оччугуй сааспытыттан бииргэ
Улааппыппыт.
138
