Page 178 - Литература 7 кылаас 2 чааhа

Көрсүбэтэ диэн миигиттэн
Хоргута-хомойо бардаҕа.
Билигин тиийэн киирдэхпинэ
Билиэ дуо миигин кини дууһата?
Манна сэгэрбиниин сылдьарбыт…
Оччоҕо санаабат этим арахсыахпыт диэн,
Аһыыттан санньыйан хараастыам диэн…
Тулатааҕы айылҕа талбааран,
Эн эмиэ санаарҕаабыт курдуккун,
Хатыҥ мастарбыт хаҥкыһан
Куруйа-соҥуйа турдаххыт куһаҕанын,
Иһиллии, иҥиэттэ турдаххыт иччитин!..
Кинини кытта сүттэ —
Кэскиллээх кэрэ инним,
Кини уоһун кытта тымныйда, —
Мин баҕарбыт итии эркиннээх олоҕум…
Өйүм-санаам туймаардаҕыан,
Көхсүм-быарым кыараатаҕыан,
Сүрэҕим кураанахсыйдаҕыан…

Соҕотох туруйа курулҕаннык турулуктуу-турулуктуу ааһар.

Аар халлааҥҥа
Аһыылаах соҕотох туруйа,
Көмүү, санньылҕан ырыа аргыстаах
Көтөҕүн тумулу кырыйа.
Билэбин эйигин, туруйа,
Былырыын эмиэ ыллаабыккын,
Суох буолбут доҕоруҥ кэриэһин
Сүрэхтэн сүтэрбэт аһыылааххын!
Аһыылаах аһыытын аһыйар,
Агдаҕа сүрэх-быар аһыйар…
Ол эрээри,
Тэптэриэ дуо биһиги аһыыбыт —
Өлбүт сүрэҕи,
Ириэриэ дуо биһиги ырыабыт —
Тымныйбыт тымыры?!

Туруйа турулуктуу-турулуктуу сүтэн хаалар.

178