Page 161 - Литература 11 кылаас 1 чааhа

КЭС ТЫЛ

Тот, кто людям подарит песню
Эхом её прозвенит.
М. Танк
Алааскар эн мас үүннэрэн хааллардаххына —
Хас саас аайы сэбирдэх буолан тыллыаҥ,
Күнүҥ сирин таптаан ыллаабыт буоллаххына —
Күн аайы күнү кытта эн тиллиэҥ.

Ийэ дойдугар тугу, ханныгы дьайаргынан —
Кырыыска да туруоҥ, ырыаҕа да ылланыаҥ,
Төрөөбүт төрүт тылгын төһө таптыыргынан —
Ой дуораана буолан өлбөт үйэлэниэҥ.

Өбүгэлэргин кэриэстээбит эбит буоллаххына —
Кэлэр кэнчээри ыччаккар кэрэтик ахтыллыаҥ,
Бар дьонуҥ туһугар олорбут эбит буоллаххына —
Бар дьонуҥ кэхтибэт кэс тылыгар дуораһыйыаҥ.

Алааскар эн мас үүннэрэн хааллардаххына —
Хас саас аайы сэбирдэх буолан тыллыаҥ,
Күнүҥ сирин таптаан ыллаабыт буоллаххына —
Күн аайы, күнү кытта эн тиллиэҥ.

ИТЭҔЭЛ

Ыраах тырымныыр уот курдук,
Ыраах кытыастар кыым курдук
Ыҥырар эрэллээх буолан,
Ыҥырар уоту итэҕэйэр буолан —
Киһи барахсан кэхтибэт,
Кэнчиэтээбэт, эстибэт,
Иннин диэки дьүккүһэр,
Иҥнибэккэ баран иһэр.

Көҥүл олоҕо — иннигэр,
Күнэ-күөнэҕэ — иннигэр,
Оол-ол көҥүлгэ тиийиэхтээх,
Олох уйгутун ситиэхтээх.
Ол иһин кини кэхтибэт,
Кэнчиэтээбэт, эстибэт,

161