Page 38 - Саха тыла 9 кылаас
P. 38
76. Пубулуустука истиилигэр дьүөрэлээх тыл-өс, этии холобурдарын
булан, санааҕытын бигэргэтиҥ.
НӨРҮӨН НӨРГҮЙ БУОЛЛУН
Төрөөбүт сирэ дойдута киһи майгытыгар сигилитигэр хайа эрэ өт-
түнэн хайаан да сабыдыаллыыр диэччилэр. Мин бу устуруокалары су-
руйа олорон тоҕо эрэ санаам кылбаһыйа унаарар Аммаҕа тиийэр.
Оо, Амма барахсан! Харах ыларын тухары нэлэһийэ тунаарар сы-
һыылара, хатыҥ чараҥ тулалаах аҥаат-муҥаат алаастара, үөскүлэҥ от-
тоох мастаах өлгөм бултаах халыҥ тайҕалара, от үрэхтэрэ, өрүһэ!.. Ам-
ма эбэ хотун туохтан да уолуһуйбакка, долгуйбакка, биир кэмник холку-
тук, наҕылыйа, наскыйа, кылбаара уста сытара харахпар субу баар.
Амма сирэ — ханнык да хаҕыс курааҥҥа, хабыр хаһыҥҥа бэриммэккэ,
үчүгэй үүнүүнү биэрэр уохтаах буордаах дойду. Дэлэҕэ даҕаны саха
дьоно бу дойдуну Кыыс Амма диэн сөҕөн махтайан, сүгүрүйэн ааттыах-
тара дуо?!
Мин биһиги норуоппут бүттүүнүн тапталлаах ытык кырдьаҕаһын
В. М. Новиковы — Күннүк Уурастыырабы хантан да буолбакка, чуолаан
субу Амма сириттэн силистэнэн-мутуктанан үөскүөхтээх этэ диэх кур-
дук санаан кэлэбин. Кини киһи быһыытынан майгыта-сигилитэ кэрэтэ,
үтүөтэ, наҕыла, айыы тыыннааҕа, бэйиэт быһыытынан ырыата-тойуга
сырдыга, ырааһа, дьэҥкэтэ, нарына-намчыта хайдах эрэ, хайдах эрэ
төрөөбүт сиригэр дьүөрэлээх.
(Софрон Данилов)
77. Бэриллибит тиэкистэн ханыы тыллары булан, суругун бэ-
лиэтин туруоруҥ, ханыы тыллар пубулуустука истиилигэр
туох оруоллаахтарын быһаарарга холонуҥ.
78. Хаһыат саҥа нүөмэрдэрин ааҕыҥ. Пубулуустука истиилинэн
суруллубут ыстатыйаны ырытарга холонуҥ, бииргэ үөрэнэр
оҕолоргутугар, учууталгытыгар иһитиннэриҥ.
38
