Page 96 - Литература 5 кылаас 1 чааhа

Чулуу тааскын торгуйдаһыах,
Дьоһун дьоннуу оруйдаһыах!
Аар-ытык ыраахтааҕыҥ
Алгыстаах тылын ылын!
Аһыыр-таҥнар тэрилгин,
Алталыы хоно-хонобун
Аҕалтара туруоҕум —
Аас-туор, аччык муҥун
Адьас билбэт буолуоҕуҥ,
Абырахтаах тордох соҥҥун
Аны ончу устуоҕуҥ.
Абырал дьүүлүм манньатын
Аҕал миэхэ эн тааскын!»
Чурумчуку, маны истэн,
Чугурус гына түстэ,
Чуоҕур, сыгынньах кэтэҕин
Доҕуо-дэгиэ тыҥыраҕынан
Чуукур-чаакыр тарбанна.
Саҥарарын сатаабакка,
Салҕаластыы туран баран:
«Саар тойон… санаабын
Сайа эттиҥ…» — диэн кээстин
Кулгааҕа эрэ иһиттэ…
Хотон хоодул ходуулуттан
Холбукатын таһаарда,
Хоруол ыраахтааҕытыгар
Хоҥкук гынан бокулуоннаан
Хомуһуннаах күндү тааһын
Хостоон ылан туттарда.

1. Ааптар Чупчуруйдаан ыраахтааҕы баайын-дуолун
хайдах ойуулууруй? Тиэкистэн булан кэпсэтиҥ.

2. Чурумчуку уонна Чупчуруйдаан тас дьүһүннэрин
тэҥнээҥ. Туох диэн түмүккэ кэлиэххэ сөбүй?

96