Page 50 - Литература 6 кылаас 1 чааhа
P. 50
Куударалаах бэскилээх эбит,
Эрэдэһиннээх үүн тиэрбэһин курдук,
Эрилкэй харахтардаах эбит,
Хара саһыл кутуругун
Харсыһыннара уурбут курдук,
Халыҥ хаастардаах эбит,
Кыһыл саһыл уорҕатын
Сахсыйа оонньообут курдук,
Кытархай иҥнэрдээх эбит,
Улуу тайах уллугун уҥуоҕун
Умса туппут курдук,
Уһун сыыйыллаҕас муруннаах эбит,
Таба кыыл акымалын силиитинэн
Нарылаан оҥорбут курдук,
Чараас уостаах эбит…
Оҕонньордоох эмээхсин
Үөрүүлэрэ үрдээтэ,
Үрүҥ күннэрэ сырдаата,
Олуктара кэҥээтэ,
Уоттара күөдьүйдэ,
Ыалларын ыҥырдылар,
Үөлээннээхтэрин үмүөрүттүлэр,
Мааны таттылар,
Малааһын оҥордулар…
Аҕалаах ийэтин иннигэр,
Арыы тыа аймахтарын иннигэр,
Уол бу курдук диэн,
Оҥостон тойук туойа турбут.
Уол:
«Алаас, сыһыы ортотугар
Аҕыс салаалаах
Аал кудук маска киирэн,
Анды сымыытын курдук,
Алла-таммалыы турар
Араҕас илгэтиттэн
Аһыы сылдьыбытым;
50
