Page 54 - Литература 6 кылаас 1 чааhа

Ол тухары маннык
Туруору уҥуоҕунан томороон,
Турар көрүҥүнэн үскэллээх
Айыы киһитин
Адьас көрбөтөҕүм!
Күн сирин көмүскүүргэ,
Айыы аймаҕын араҥаччылыырга
Кырдьык да сөптөөх киһи
Кырдьаҕас оҕонньордоох эмээхсинтэн
Төлкөлөнөн-аналланан
Төрөөн үөскээбит эбиккин…
Бу эн
Ким кэлэҥҥин
Кэс тылгын
Кэпсии олороҕун диэтэргин,
Чыҥкыныыр чыҥыс халлаан уола
Чуҥкунуур Чуура бухатыыр диэн этим.
Ону
Самантан тус хоту,
Сайыҥҥы күн тахсыытынан олохтоох,
Аҕыс күннүк сири
Атаҕын аннынан
Аралдьыта үктүүр
Алып Хандаҕай хара аттаах
Араат Мохсоҕол бухатыыр,
Уһун уҥуохпун урусхаллаан,
Халыҥ тириибин хайытан,
Илдьиккэ сылдьар
Элэс хара оҥоһунна,
Сорукка сүүрэр
Сорук-боллур гынна!
Ол, бу эн туох
Модун соруктаах буолаҥҥын,
Дьуон дьаҥыдыйдыҥ диир буоллаххына,
Икки кэрэ чуор кулгааххынан
Истэ-болҕойо олорууй эрэ!
Эриэн тойон оҕонньор аҕалаах,
Эбириэлдьин хотун эмээхсин ийэлээх,

54