Page 61 - Литература 6 кылаас 1 чааhа

Омуннаах өттө
Уҥаары гынна,
Өмүрэх өттө
Өлөрүнээри тиистэ…
Ол ыккардыгар,
Икки күлүктээх
Эмньик кулун аттаах
Эрчимэн Бэргэн
Ый отут хонугар айаннаан,
Ыал аххан диэх курдук ыал
Ыырыгар чугаһаан кэллэ.
Кыталыктаах
Кылбаарытта сыһыы
Кылбайан көһүннэ,
Туруйалаах
Туттаарытта хонуу
Тунааран көһүннэ,
Суо ыал
Суола харалыйан киирдэ,
Баай ыал
Балаҕана багдайан көһүннэ.
Оччо көстүбүтү
Өр гыныах киһи буолуо дуо
Эрчимэн Бэргэн,
Омуннаах үлүгэрдик
Ойутан тиийэн кэлэн,
Эмньик кулун атын
Тойон сэргэҕэ
Туруору баайан кэбистэ.

Ону
Араат Мохсоҕол,
Атах тэбэ оонньуу сылдьан,
Алаас куулатыттан көрөн,
Абатыгар,
Айаҕыттан кутаа уот кытыастан,
Чанчыгыттан сиэрэ уота саккыраан,
Омуннаахтык уһуутаан ылаттаата,
Хатаннык хаһыытаан ылаттаата.

61