Page 62 - Литература 6 кылаас 1 чааhа

Содуомнаах
Суорба таас курдук сутуругун
Өрө ууммутунан,
Хадьыктаһа киирэн иһэр
Хагдаҥ эһэ курдук,
Туттуммакка-чугуйбакка,
Уун-утары хааман кэллэ.

Биһиги киһибит,
Саннын тоһуйан дарайан,
Түөһүн тоһуйан мөтөйөн,
Эмиэ илэһэ-талаһа курдук,
Иннинэн утары киирдэ…
Аал курдук
Анньыһа түстүлэр,
Килиин курдук
Кэтиһэ түстүлэр…
Дьиэлээх киһи
Убаһа соннооҕу
Утары көрдөрбөтөх киһи эбит,
Сарыы таҥастааҕы
Саҥа аахсыһыннарбатах киһи эбит.
Уйан сирэ буолаарай диэн,
Охсубутунан барда,
Чараас чабырҕайа буолаарай диэн,
Дайбаабытынан барда.
Охсуолаһан ылан
Уохтарын харатаат,
Илиилэрин уһугунан эристилэр,
Тарбахтарын төбөтүнэн тардыаластылар.
Уолуктарын олуһан,
Ойуур тыаны
Урусхаллыы кэстилэр,
Суон саалларыттан умса баттаһан,
Суорба таас хайалары,
Субуулаах от курдук, тоҕо кэстилэр.
Бу сылдьан,
Биһиги киһибит
Анараа киһини

62