Page 16 - Литература 7 кылаас 1 чааhа

Туулаабыкка туһалаһан,
Ардьылаабыкка аһылыктаһан,
Бэрэмээттээбиккэ бэрсиһэн,
Күөҕүлээбиккэ күндүлэһэн,
Үгүс киһини үөрпүт,
Элбэх киһини ииппит,
Эбээн, чукча иитиллибит,
Нуучча, саха туһаммыт.
Дьокуускай куорат туоһахталаах,
Улуу үрэх уолаттардаах,
От үрэх оҕолордоох,
Таас үрэх дьахталлардаах,
Кыра үрэх кыргыттардаах,
Кэҥис үрэх кэргэттэрдээх,
Туора үрэх торгуомсуктаах,
Элбэх үрэх эргиэмсиктээх,
Үгүс элбэх уулаах,
Өрүкүйэр сүүрүктээх
Өрөгөйдөөх-соргулаах
Өлүөнэ эбэм барахсан
Төрөөбүт төрүт дойдум
Үрүҥ сүнньэ буолан,
Үллэн үөскээн турбут
Үтүө кэрэ дьүһүнүн
Үтүөргээн хоһуйдум...
Одуулаан көрөн туран —
Олох да уолуо диэн толкуйдаабатым,
Хаһан да хатырыа диэн санаабатым.
Үскэм үүнээйитэ үүнэ турууһу,
Үөскүүр киһитэ үүнэ турууһу,
Иитэр сүөһүтэ элбии турууһу диэн
Өйдүөн кэбистим, доҕоттоор!

16