Page 51 - Литература 11 кылаас 2 чааhа

Куһууран-куугунаан, халлааҥҥа уһуутаан,
Былыты быһыахпын, ый түөһүн салыахпын,
Күн өркөн төлөнүн буруонан сабыахпын,
Муоралар ууларын оргута оонньуохпун
Баҕарар буоллаҕым! Баҕарар буоллаҕым!
Уу:
— Киэр, түксү, түөһэйбит! Кэпсэниэх бүппүтүн!
Дириҥтэн тэриллээх, ыраахтан ыйаахтаах
Улуукан удьуора буолларбын даҕаны
Эн курдук киһиргиэм, кэпсэниэм суоҕа мин.

Төрөөбүт далайым — ийэкээм урсуна
Халлааны кытары ханыылыы тутуллар,
Дьаарбайар дуолбутун тэҥнэһэр буоллахха —
Эйиэнэ чэрдийбит түөн оннун санатар.

Тайааннаах тайҕаны салыырым диэхтиигин —
Наһаалаан этэргин бэйэҥ да билэҕин:
Чачыргыы-чачыргыы тарҕанан эрэргин
Таарыйан ааһаммын, чалбахха тэпсэрим.

Хайаны тобулар, байҕалтан чоройор
Күл-буруо үөлэскин күөн тутта барыма —
Ыарыһах этигэр ымынах кэриэтэ,
Ыксары ыктахха умуллан хаалаҕын.
Эн ааспыт хонуугар ыыс сыта тунуйар,
Эн ааспыт тыаларгар күл-көмөр бурҕайар,
Эн сырыыҥ кэнниттэн биир чыычаах ыллаабат,
Эн сырыыҥ кэнниттэн биир ача тыллыбат.
Мин сиргэ-дойдуга уйгуну халытан,
Кураайы хонууну күөҕүнэн долгутан,
Эйигин — Ад уотун далайга тумнаран,
Ньирилээн ааһабын айхаллаах суолунан! —
Инньэ диэт, күөллэри күөннэрин күллэрдэ,
Өрүскэ үлүскэн сүүрүгү мөхтөрдө,
Муораҕа будулҕан долгуну туруорда,
Байҕалга баргыһар бааллары хамсатта!
Күрүлээн-харылаан, күүһүрэн-уоҕуран,
Уорданан-абаран, Уот диэки халыйда,
Сабыта тэбистэ, долгуҥҥа бүрүйдэ,
Өстөөҕүн өһөрдө, дириҥҥэ тимиртэ!..

51