Page 82 - Литература 6 кылаас 1 чааhа

Уһун уорҕаҕар
Тускулаан үөскэппит
Дьоһуннаах оҕоҥ,
Дьоллоох кыыһыҥ —
Кыһалҕаҕа ылларан,
Туспа туруу дойду
Содуомугар тэптэрбит
Тойон убайым —
Туйаҕын саҕатыттан
Чочугур чуоҕур аттаах
Дьороҕоно сото
Тойон Дьөллүүт бухатыыр
Туһааннаах суолун сонордоон,
Обот соллоҥ бииһин кытта
Туруулаһа барар күнүм буолла.
Аартыгым aргыһа
Айыы оҕото ат көлөбүн
Анаан-минээн
Аҕала охсууй!
Саар булгунньах саҕа
Саргыбын салайан,
Туруук очуос курдук
Дьолбун тускулаан,
Алҕаан-албаан
Атаарыый диэммин
Үс бараа күлүккэр
Үстэ сүгүрүйдэҕим буоллун! — диэн,
Ыллаабыт саҥатын дуораана
Ыраата сүтэ илигинэ,
Аал Кудук Мас
Арыы ньалаҕай хатырыга,
Xачыгырыы-бачыгырыы тыаһаан,
Хамнаан наскылдьыйарга дылы гынна,
Нэлиэр көмүс сэбирдэҕэ
Илибирдии сэгэйэргэ дылы гынна.
Чопчу көмүс туорааҕа
Дорҕооннонорго дылы гынна.
Аргыый аҕай арыллан,

82