Page 87 - Литература 6 кылаас 1 чааhа

Суол содуомнаах, — диэн,
Туруору тутан толкуйдаата,
Сытыары тутан сыаналаата.
Суостуганнаах-суодаллаах,
Субу кураҕай дойду
Суолун иччитин
Сыалааҕынан сыһааҕыртахха,
Амырыыннаах-алдьархайдаах,
Аллараа дьилэй дойду
Аартыгын иччитин
Амтаннааҕынан аһаттахха,
Аһарыаҕа! — дии санаата.

Айыы дьөһөгөй оҕото
Аналлаах атын
Нэлиэр көмүс сиэлиттэн
Аҕыс атыыр кылы
Арыйа тардан ылан,
Айхаллаабытынан антах амалыйда,
Уруйдаабытынан утары уунна.

Онуоха буоллаҕына,
Дьол тускулаах,
Саргы аналлаах диэбит курдук,
Анды хараҕын саҕа
Алаарыйан хаалбыт,
Алаҕаркаан бэйэлээх,
Аан ийэ дойдутуттан арахсарыгар
Анаан-минээн ылбыт,
Аҕыс тыргыл көмүс сиэлэ
Арыл гына түстэ да,
Ача сүмэһин оттоох,
Алаас сыһыыга көччүйбүт
Аҕыс ахта байтаһын
Атыыр сылгы буоланнар,
Таныыларын тардырҕатан,
Туора-маары ойуолаан,
Сырсан лиһигирэһэ сырыттылар.

87