Page 90 - Литература 6 кылаас 1 чааhа

Хатааһын сулуһун курдук,
Хатан-чаҕаан харахтаах,
Үрдүнэн үрүҥ чыычааҕы
Өрүү көтүппэтэх,
Аннынан сур күүдээҕи
Супту аһарбатах
Үс садаҕа күөкэгэр бастаах,
Өлөр өлүү Моҕой кыыла
Өрө түллэх гынаат,
Түҥкэтэх өттүнэн тура холоруктаабытыгар
Хаан ньамаҕыллай аартык
Xaҥac чанчыга хайа ыстанан,
Айан суола арыл гына түспүтүгэр,
Айыы дьөһөгөй оҕото, ат, барахсан
Айаннаабытын кубулуппакка
Атаралыы көтө турда.

Ол дьигискэннээх айаҥҥа
Ат сылгы барахсан
Хаан халысхан хайаларын
Хайыта тэбэн хампарытта,
Таас дьигискэн ыллыктарын
Сиритэ тэбэн сиҥнэрдэ,
Муус дьолуо суолларын
Тоҕута тэбэн суулларда,
Аат дьабын аартыктарын
Атаҕынан арбыйа оонньоото,
Дьэбилгэ бадараан сибиирдэригэр
Тибилийэн тиийэн,
Дьилбэгин оруутугар диэри
Үлтү күөдүлгэхтээн
Көмөгөйүнэн күртэ,
Дьилбэгинэн силэйдэ.
Тус хоту нуоралаан,
Түөрт хаардаах бугул саҕа
Түөрэм таас туйаҕынан
Түөрт чөҥөрө
Тыымпы күөл курдугу
Тыыра тэптэрдэ.

90