Page 93 - Литература 6 кылаас 1 чааhа

Көстүбэт ыаллара
Күдэрик буолан көттүлэр,
Илиэһэй ыаллара
Сэбирдэх буолан сиксилиннилэр,
Абааһы ыаллара
Аабылаан буолан айманнылар.
Халлааннара тордуйалаах уу курдук
Хараара дьалкылынна,
Хара өһөx хаарынан
Хатайдаабыт курдук буолла.
Сирдэрэ атыйахтаах уу курдук
Сиҥниэх айылаах иэгэлдьийдэ,
Сиһигинэн бутуйбут курдук буолла.
Муус будулҕан байҕал
Муннугуттан бууралаата,
Кытыытыттан кыыһырда,
Түгэҕиттэн түөһүлүннэ,
Анныттан аймаһыйда,
Хаан балаһа бааллара
Таас хайа чампарыгар
Таһымнаан таҕыстылар.

Соҕотох харахтаах,
Сойуо тумустаах
Сутаакы биистэрэ
Туулаан, ардьалаан,
Баҕалаан, чохулаан
Аһыыр-сиир сирдэриттэн
Сэттэ хос кэрдиистээх,
Аҕыс хос чампарыктаах
Хаан балаһа бааллар
Өрө дьэбилиһэн тахсаннар,
Таҥнары эҕирийбэхтээн ыллылар.
Онтон оппуттара,
Үгүрэлии-үгүрэлии,
Үөһээ дьабыҥҥа үргэн көттүлэр.
Часкыйа-часкыйа,
Аллараа биискэ
Таҥнары такаалаан тарҕастылар.

93