Page 84 - Литература 6 кылаас 2 чааhа

— Мин уорбатаҕым.
— Оччоҕо кимнээх уоралларый?
— Доҕотторум, Махнолаах.
— Кимнээх диигин?
— Махнолаах.
— Ол кимий? Хантан кэлбитий?
— Билбэппин.
— Ол-бу буолан кубулунума, барытын кырдьыгынан
кэпсээн кулу. Биһиги син биир билиэхпит.
Айдаар командирдарын аатын-суолун кырдьык билбэт!
Өрүү «Махно» диэн ыҥыраллара.
— Билбэппин.
— Оскуолаҕа оҕолор таҥастара эмиэ сүппүт.
— Билбэппин.
— Сымыйаҥ!
Айдаар кырдьыгын дакаастаһыах курдук санаан баран,
син биир итэҕэйбэттэрин билэн тохтоото. Ону биирдэрэ
буруйун билиммитин курдук санаата.
— Эн сааскар, Аҕа дойдуну көмүскүүр Улуу сэрии
сылларыгар, фроҥҥа саа-саадах тутан сэриилэспиттэрэ.
Манна тыылга оҕолор ханнык да улахан киһиттэн хаалсыбакка
үлэлээбиттэрэ. Оттон эн уоруунан дьарыктанаҕын, үөрэххин
быраҕан бырадьаагы сылдьаҕын, — дьахтар кырааскалаах
уоһа мэктиэтигэр чорбойон тахсыбыкка дылы.
«Сэрии. Ол саҕана төрөөбүтүм буоллар, мин даҕаны...
Абалаах хойутаан төрөөммүн оччотооҕу геройствоттан мат-
таҕым» дии санаата Айдаар. Онуоха холоотоххо, билигин
туох геройствота баарый? Үөрэх да үөрэх, барытыгар бы-
раабыла этэринэн хамсаныы, олоруу, туруу. Салгымтыа-
лаах. Ол тэҥэ сир үрдүгэр көҥүл сылдьыбыт быдан ордук.
— Манан эйигин кытта ньээҥкэлэһэн бүтэбин. Оскуо-
латтан общественнай иитээччини анаатыбыт. Ол кыа-
йан көмөлөспөтө, — милиция инспектора салгыы саҥара
олордо. — Директор биэрбит характеристиката бу баар.
Онно эйигин аналлаах оскуолаҕа ыытарга туруорсар.
«Аналлаах оскуола. Ол аата тугуй? Хаайыы дуо?» уол
өйүгэр итинник мунаах санаалар кииртэлээн таҕыстылар.
Киниэхэ син биир. Ханна да ыыттыннар.

84