Page 109 - Литература 7 кылаас 2 чааhа

— Тукаам, үс бастыҥ үлэһит эрээри дуоннааҕы оттооботох
үһүбүт. Кус оҕолуу оонньуу сылдьыбыттара буолуо, дьахтара
Амма ыалын кэрийэн сайылаатаҕа, оту кыайбатахтар, хаамтар-
быттар диэн тойоммут кыыһырар сурахтааҕа.

— Оттон, аҕаа, бу хотон, күрүө-хаһаа, кыһынын ону көрөн
олоруубут — элбэх үлэ буолбат дуо?

— Биэбэкээм, айахпытыгар аһаан, санныбытыгар таҥнан
олордохпут эбээт.

— Биир ууга түһэн өлбүт тиҥэһэ оҕуһу кытта сылбархай
үүтүнэн эрэ олоробут буолбат дуо?

— Кэбис, тукаам, ордук-хоһу саҥарыма. Аны истэн өлүү
буолуо. Биһиги диэн хамначчыттар буоллахпыт дии. Хамначчыт
үлэлиэхтээх эрэ. Биһиги аналбыт, Таҥара ыйааҕа оннук, — Уй-
баан уола тылга тииспитин сүрдүк абааһы көрө быһыытыйда.

Кырдьыга, кини ити туһунан хаһан да ырыта сатаабат этэ,
ол иһин уол кэлин ыйытыытыгар олулла түһэн ылла.

— Аҕаа, оттон хамнаспытын аахсан ылаҥҥын, аны сайын
Лөгөнтөйтөн баран хааллахпытына? Манна Аммаҕа...

— Эс! — Уйбаан, уолун ситэ саҥарпакка эрэ, эргим-ургум
көрүтэлээтэ, ыгылыйда уонна бүтэҥи куолаһынан: — Туох тылын
тылластыҥ?! Киниттэн араҕыстахпытына, биир да хонукка аһыыр
аһа суох хаалабыт буолбат дуо?! Хайдах дьон буолуохпутун ба-
ран... Эн ити хантан... Итинник түҥ-таҥ тыллаһан хааллыҥ?

— Аҕаа, бу сайын от охсо сырыттахпына, Уйбаныап су-
даарыскай түбэһэ кэлэн, мин охсорбун көрө-көрө, төбөтүн
илгистибитэ уонна тохтотон, арааһынайы кэпсээбитэ. Онтон
бүтэһигэр: «Лөгөнтөй баайга наһаа элбэҕи үлэлиир эбиккит да,
киһигит туту да төлүө суоҕа. Эһиги Лөгөнтөйтөн арахсыҥ. Бу
бэйэлээх үлэһит дьон өлөн-охтон биэриэххит суоҕа. Бултаан да
аһаан ыал буолуоххут. Баттатымаҥ. Өскө туох эмэ буоллаҕына,
мин көмөлөһө сатыам», — диэбитэ. Кини дьадьаҥылары, биһи-
ги курдук хамначчыттары, үлэһит дьону көмүскэһэн бу дойдуга
көскө кэлбит үһү ээ. Ийэтэ, аҕата, бары аймахтара ыраахтааҕы
олорор куоратыгар бааллар үһү.

— Аата, барахсаны! — Сүөкүлэ саҥа аллайа түһэр.
Уйбаан, саҥата суох ньыхаччы туттан олорон, хас да сыллаа-
ҕыта Уйбаныап судаарыскайы кытта көрсүһэн кэпсэтэн турар-
дааҕын өйдүү сатыы олордо. Кыс маска кэлэн, кинини кытта сүр

109