Page 115 - Литература 7 кылаас 2 чааhа

аҕылаан-мэҥилээн, тыын быһаҕаһа тыынан кэлбититтэн, туох
эрэ алдьархай тахсыбытын өтө сэрэйэ оҕуста.

— Хайа, тукаам, туох буолбутуй? — диэн ыйыта көрүстэ.
— Аҕаа, бөрөлөр!..
— Ханна?
— Убаһаларбытын сиэбиттэр.
— Оо, сорбут эбит! — Уйбаан сүгэтин мүччү тутан, сыыйа
накыйан, кэрдэ турар дүлүҥүн үрдүгэр олорон кэбистэ. Сир
диэки көрөн сөҥөн олорбохтоото, онтон өрө тыынан баран:
— Үйэбит тухары хааннаах хабалаҕа хаптардахпыт ити. Бу
өлүүнү! Аны тойоммут иһэр дии. Бар, тукаам, дьиэҕэ киир,
уоккун отун, — Уйбаан, ыгылыйбыт куолаһынан соруйа охсоот,
доруобуна сыарҕаҕа тиэрэ түспүт, ыас хара аттаах киһи айан-
натан бидилитэн кэлбитигэр, тоһуйа барда.
Сыарҕалаах ат күрүө ааныттан иҥиннэ. Сыарҕаттан кэрэ-
мэс саһыл тыһа бэргэһэлээх, моонньун иккитэ эринэн ноту-
руускалыы түһэриммит сабыс-саҥа моойторуктаах, быыһык
саҕынньахтаах, хара таба тыһа күрүмэ этэрбэстээх, бөрө тыһа
үтүлүктээх соноон эрэр саар тэгил уҥуохтаах киһи, сүр эрчим-
нээхтик туттан-хаптан, чэпчэкитик түһэн кэллэ.
— Тойонуом, аккын билигин аһатабын дуу, сойутабын дуу? —
диэхтээтэ Уйбаан.
— Аһат. Билигин ааһыам, — дьаһайда кэлбит киһи, ат тип-
пит хаарын таҥаһыттан тэбэнэ туран.
Уйбаан тойоно дьиэ диэки барбытын кэнниттэн батыһа
көрөн хаалла, өрө тыынна уонна: «Оо, дьиэҕэ киирбэтэх киһи
баар ини!» — диэбиттии ыардык хааман, атын кыбыы ааныгар
илдьэн баайда, муоһалаах үүнүн устан түүрдэ, ат сиһин быатын
уһата баайда. Чахчы дьулайбыттыы тохтоон, дьиэтин диэки эр-
гиллэн туран, бэргэһэтин сүүһүгэр умса анньан баран, кэтэҕин
тарбанна. Онтон торбос сиир отуттан атырдьахтаан аҕалан,
атын иннигэр быраҕан биэрдэ, атырдьаҕын күрүөҕэ өйөннөрө
уурда. Эр хаанын киллэрбиттии, кыадьах гынан, ыстаанын өрө
сигэнэн кэбистэ. Мээр-сээр дьиэ диэки баран иһэн тохтото-
лоон, хаста да иһиллэтэлээн көрдө. Дьиэттэн туох да иһил-
либэт. Уйбаан дьэ киирдэ. Тойон уҥа ороҥҥо олорон сүөһүлэр
туруктарын ыйыталаһан эрэр эбит. Тугу да билбэккэ сылдьар
Сүөкүлэ күө-дьаа эппиэттии турар.

115