Page 178 - Литература 9 кылаас 1 чааһа

(муҥатыйа-муҥатыйа)

Сылааспар тартаран сынньана түһээри,
Сыыгыныы-сыыгыныы, нуктаан бардахпына —
Ойон тураннар, оройбун хаһаллар,
Оҕолуун-дьахтардыын бары мөҕөллөр…

(абаран)

Ха-ха-ха!!! Хатан Тэмиэрийэ, күллүм…
Халлаан хатан дьыбарданнын!

(Уотунан тибиирэр, тимирэн хаалар.)

II

К ы һ ы л О й у у н. Уһуктан туран, уот иннигэр баран аргынньахтаан олорор.

Кыһыл Ойуун

Сир ийэ иэнигэр
Сидьиҥ быһыы сириэдийдэ,
Орто дойду уолуйда,
Олох-дьаһах дьадайда,
Чаҕыйда-чачайда,
Чаллахсыйар кэмэ кэллэ.
Саҥа үйэ саргылаах баһылыгын,
Саллан баран, салбанартан бэрди
Сатыы соллоҥо билбэтэ,
Үөлэн баран, үтэртэн бэрди
Үөмэр соллоҥо көрбөтө.
Ким баарый хаанынан ытаабатах?
Ким баарый хабалаҕа киирбэтэх?

(тохтуу-тохтуу)

Үйэлэр быыстарыгар үөскээн төрөөбүт
Үллэр күүстээх, өлгөм өйдөөх
Соҕотох туйгун, икки атахтаах,
Солону-сокуону, сору-муҥу
Солбонутар сокуона суох эбит.
Чаҕылҕан курдук күлүмнүү-күлүмнүү,
Чаҕырыйбат-чачайбыт бэйэтэ,
Кулут дойдутун, кырыыс сирин,
Кулугутун тардаат, өһөр эбит.

(тура-тура)

Солону-сокуону, сору-муҥу
Солбонутуоҕа сордоох-муҥнаах,
Соххор-доҕолоҥ кулут аймаҕа.

178