Page 51 - Литература 10 кылаас 1 чааhа
P. 51
Көтүрдэр тииспит билэтэ
Сардаҥалаах халлаантан
Саппаҕырыа диэннэр,
Саарбаҕа саһыараннар,
Килбиэннээх халлаантан
Киртийиэ диэннэр
Киискэ кистээннэр,
Айыы хаан аймаҕыттан
Аҥаардастыы аатыраҥҥын,
Урааҥхай сахаттан
Ураты сураҕыраҥҥын
Үөһээ бөҕөттөн
Үмүөрүһэн түһэннэр
Үтүрүөбэт үлүгэр
Үөскээбитэ буолбаат,
Аллараа бөҕөттөн
Адаҕыйан тахсаннар
Алдьархай бөҕө
Ааҥнаабыта буолбаат?!!!
Урааҥхай саха
Улуу бэттэрин
Уһун уҥуохтара
Урусхал буолбута,
Кылгас уҥуохтара
Кыдьымах буолбута…
Эн бэйэкэлээх
Ир суолгун
Ирдээн киирэн,
Тоҥ суолгун
Тордоон киирэн
Үс үүт күрүөнү
Үрдүнэн көстөр
Үрүмэччи маҕан аттаах
Үрүҥ Уолан оҕокком
Чэчэгэйин тэстэрэн,
Чэгиэн этин сэймэктэтэн,
Халыҥ тириитин хайыттаран,
Хара хаана тохтон
Уһун уҥуоҕа
Урусхал буолбут,
Кылгас уҥуоҕа
Кыдьымах буолбут…
51
