Page 11 - Литература 11 кылаас 1 чааhа

Кылыһы кылыска туора тоһуйсарын,
Чудской күөл мууһугар тэлгэһэрин,
Өстөөх знамятын күлгэ тэпсиһэрин!
Бу, сип-сибилигин манна
Көрөн турар курдукпун
Аатырбыт Наполеон сэриитин
Арҕаа толооннорго самнарсан
Халыҥ элбэх эн бухатыырдарыҥ
Хатан ыстаал сытыы кылыстарын
Үрүҥ күҥҥэ өрө кылбаҥнатан,
Үөрэн-көтөн парадтаан иһэллэрин.
Бу, сип-сибилигин манна
Көрөн турар курдукпун
Литература күлүмүрдэс хараамыгар
Эн биир улуу уолуҥ Державин
Буолбут эбээт уһун үйэ былаһыгар
Көмүстээх мрамор тирээбил.
Кини хоһооно өрө ыһыахтанар
Кыайыы салютун кыыһар кыымынан.
Суол кытыыта сибэкки ойууланар
Кини одатын дьэрэкээннээх санаатынан!
Бу, сип-сибилигин манна
Истэн турар курдукпун —
Улуу Рахманинов кынаттаах музыката
Омуннаах ырыаны дьиэрэччи тардарын.
Некрасов ыар сүгэһэрдээх лирата
Улуу Русь ынчыктыы хаамарын.
Сибэкки симэхтээх Есенин лириката
Сииктээх киэһэ чараҥ устун дуораччы
ааҕылларын.

* * *
Улуу Аҕа дойду сэриитигэр
Уотунан кытыаста умайбытыҥ.
Москва, Ленинград инники кирбиитигэр
Тоҥ күөҥҥүнэн эн өстөөҕү утары
тоһуйбутуҥ…
Куорат, тыа манна барыта умайбыта,
Хонуу, толоон барыта хоруорбута,
Халлаан өҥө хараара барыйбыта,
Хара буруо сабардыы тардыллыбыта.
Уордаах өһүөн манна сытыыламмыта.

11