Page 40 - Литература 11 кылаас 1 чааhа

Ылы-чып, чуумпу, сөрүүн,
Ыалларым утуйдулар.
Оргууй бигии-бигиибин
Утутабын эйигин:
Оҕом, оҕом, утуйууй,
Утуй, утуй, утуйууй!
Оо, оокком, эн билбэккин,
Сэрии дьылын баттаһа,
Аҕаҥ суоҕар кэлбиккин,
Аҕаҥ баарта кыргыһа
Арҕаа, ыраах сирдэргэ.
Билигин бу түүннэргэ
Сылаастык утуйбакка,
Сылдьара буолуо уокка.
Күнүм, ыйым, чыычааҕым,
Эн үтүө аҕалааҕыҥ.
Утуй, утуй, сүрэҕим,
Утуй, сынньат ийэҕин!
Оҕом, оҕом аҕаҕын
Оо, батар да эбиккин,
Кини хара xapaҕын
Уотун илдьэ кэлбиккин,
Көрө-көрө үөрэбин.
Көмүһүм, мин билэбин:
Сэрии бүтүө, кыайыахпыт, —
Биһи аҕаланыахпыт.
Күүтэр, күнүм, утуйууй,
Күүстэ-уохта мунньунан,
Улаат, тупсан тоһуйууй,
Уо, дьэ, кэлиэ эн аҕаҥ!
Ыраас, көмүс ый көрдө
Кыараҕас түннүгүнэн,
Оргууй дайбаан ууҥ көттө,
Оҕом, эн үрдүгүнэн.
Чэбдик кэрэ бараан түүн
Түстэ Ийэ дойдубар.
Ылы-чып, чуумпу, сөрүүн,
Ыалларым утуйдулар.
Күнүм, ыйым, чыычааҕым,
Эн үтүө аҕалааҕыҥ.
Утуй, утуй, сүрэҕим,
Утуй, сынньат ийэҕин!

40