Page 31 - Литература 11 кылаас 2 чааhа

Одуулаһар кини уоран.
Барыта күндү, сонун…
Баар «Чапаев», «Спартак»,
«Ыстаал хайдах хатарыллыбыта».
Дьоруойдары дууһата
Ордук таптыыр быһыылаах…
Истиҥ сэһэн тахсыбата…
«Чэ, мин дьиэлиим…»
«Сылдьар буолаар»
Кыыс үөрбүттүү баһыыбалаата.
Эйэҕэс да буоллаллар
Хаҕыс тыллар эмиэ бааллар.

20

Көр эрэ, маннык кыысчаан
Кэнчээрини абылаатаҕа,
Киниттэн эрэ сылтаан
Ийэккэтин умнуоҕа…
Кыысчаан кимий? Ким билэр…
Туттарын курдук, сэмэй,
Аламаҕай, үчүгэй
Барахсан дуу? Эбэтэр
Кубулунар артискалыы?
Аттестат ылан баран,
Куорат хобун сыымайдыы
Үлэлээбэккэ, быар куустан
Олорор. Toҕo? Туохтан?

Ыйытыылар уонна сорудахтар
1. Иван Гоголев бу айымньытын хас сыллаахха суруйбутун,
айымньы хаһааҥҥы кэм ыччатын көрдөрөрүн болҕойуҥ.
2. Кэнчээри уонна Еля таптал иэйиитинэн кынаттаммыт
кэмнэрин бэйиэт хайдах хоһуйар?
3. «Күн хайата» арамаан толору тиэкиһин булуҥ, эдэр дьон
маҥнайгы истиҥ тапталларыгар көрсөр уустук түгэннэрин
өйдөөн ааҕыҥ.
4. Иван Гоголев хоһоонунан арамаанын кимиэхэ анаабытай?
Саха норуотугар кини туох суолталааҕый?
5. Хоһоонунан арамаан өйдөбүлүн быһаарарга холонуҥ. Саха
суру йааччыларын атын ханнык хоһоонунан арамааннарын,
сэһэннэрин билэҕит?

31